Kemi Sebanın həbs olunma səbəbi | Fransanın “demokratiya”sı bu dəfə də təəccübləndirmədi

Fransanın “demokratiya”sı bu dəfə də təəccübləndirməyib.

Belə ki, ölkənin müstəmləkəçilik siyasətinin əleyhinə çıxan, eləcə də antiimperialist mövqeyi ilə tanınan siyasi aktivist Kemi Seba Paris polisi tərəfindən saxlanılıb.

Polislər onu oktyabrın 15-də günorta saatlarında restoranda nahar etdiyi zaman həbs ediblər.

Oktyabrın 10-da İspaniyadan Fransaya gələn Kemi Sebanın Fransa ərazisinə daxil olarkən Nigeriya diplomatik pasportundan istifadə etdiyi bildirilir. Həbsin səbəbi göz önündə olsa da, Paris hakimiyyəti hələ də bu məsələ ilə bağlı rəsmi açıqlama verməyib.

Qeyd edək ki, bir müddət əvvəl Nigerin lideri Abdorahmane Tiani tərəfindən müşavir təyin olunan Kemi Seba Fransa hökumətinin müstəmləkə siyasətinə qarşı radikal çıxışları ilə tanınırdı. Onun təyinatından sonra Niger Qərb ölkələri ilə diplomatik əlaqələrini də dayandırıb.

Xatırladaq ki, bir müddət əvvəl Kemi Seba Bakıda keçirilən Fransa Müstəmləkə Siyasəti Əleyhinə Beynəlxalq Konfransda da iştirak edib. O, Fransa neokolonializmi ilə mübarizəni müharibəyə bənzədib. Bakının dəstəyini heç vaxt əsirgəmədiyini söyləyən fəal elə son müsahibələrindən birində Azərbaycana yardımı və baş verənlər qarşısında susmadığı üçün təşəkkür edib.

Qeyd edək ki, bundan əvvəl siyasi fəal Fransanın müstəmləkəçilik siyasətinin Afrika ölkələrinə, habelə dənizaşırı ərazilərə vurduğu ziyanı açıq şəkildə pislədiyinə görə adı Parisin qara siyahısına salınıb. Fransa K.Sebanı susdurmaq üçün bir neçə dəfə onu həbs edib, lakin bununla da kifayətlənməyərək siyasi fəalı ölkə vətəndaşlığından məhrum edib.