Məhkəmə prosesində vətəndaşlarla bağlı hansı məqamları nəzərə almaq lazımdır?

“Hər bir hakimə düşən işin sayı kifayət qədər olduğundan bizə müraciət edən vətəndaşların böyük əksəriyyəti çıxarılan qərardan deyil, prosesdən şikayətlənir”.

Bu fikirləri Milli Məclisin oktyabrın 8-də keçirilən plenar iclasında çıxışı zamanı deputat Siyavuş Novruzov deyib.

O bildirib ki, həmin proses hüquqi faktlara uyğun formada həyata keçməyəndə qərarın etibarlılığı diqqəti kifayət qədər cəlb etmir:

“Məhkəmədə əsas hallardan biri prosesin düzgün həyata keçirilməsidir. Başa düşürəm ki, bu gün kifayət qədər boşanma və mülkiyyət münasibətləri ilə bağlı məhkəmələrə müraciətlər var. Hər kəs də üzünü məhkəməyə tutur, çünki bunu digər hüquq-mühafizə orqanları araşdıra bilməz. Bunu məhkəmə araşdırmalı və qərar qəbul etməlidir. Ona görə də iş çoxdur və keyfiyyət baxımından yaxşı olması üçün müraciətlərə axıra kimi baxılmalı və tam şəkildə qərar qəbul edilməlidir”.