Nəqliyyatda hansı yeniliklər olacaq? | Məktəblərə avtobus veriləcək, bu yollar isə...

Prezident İlham Əliyevin 30 yanvar 2025 ci il tarixli Sərəncamı ilə "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı" təsdiq edilib.

Dövlət proqramına əsasən, Bakı dairəvi-1 avtomobil yolu ilə Ziya Bünyadov prospektini əlaqələndirən dairəvi avtomobil yolu layihələndiriləcək, tikintisi və istismara verilməsi təmin ediləcək. Bilgəh-Novxanı-Xırdalan və Şamaxı avtomobil yolunun da tikintisi nəzərdə tutulub.

20 Yanvar yol qovşağının təkmilləşdirilməsi, yeni bağlantıların yaradılması planlaşdırılır.

Həmçinin Bakı-Xırdalan-Sumqayıt dəmir yolu xəttinin təkmilləşdirilməsi nəzərdə tutulur. Güzdək-Qaradağ, Yeni Suraxanı-Hövsan, Zabrat-Maştağa-Bağlar, Bakıxanov-Binə-Qala xətləri bərpa ediləcək. “Sea Breeze” - Pirşağı tramvay xətti çəkiləcək.

Mehdiabaddan Binəqədinin cənub istiqaməti ilə “28 May” stansiyasına kütləvi sərnişindaşıma həllinin tətbiqi reallaşdırılacaq.

Dövlət proqramı çərçivəsində Bakı şəhərində yerləşən təhsil müəssisələrinin fəaliyyətinin şəhərin nəqliyyat sıxlığına təsiri qiymətləndirilib, ümumi təhsil və məktəbəqədər təhsil müəssisələrində təhsil alanların rahat və təhlükəsiz daşınması məqsədilə “məktəb avtobusları”ndan istifadə təşkil ediləcək.

Mobillik kontekstində şəhərin müxtəlif nöqtələrini birləşdirən və insanların sürətli, etibarlı şəkildə daşınmasını təmin edən metro sahəsində də bir sıra addımlar atılacaq. Metro nəqliyyatı üzrə 299 yeni vaqon alınacaq. Proqrama uyğun olaraq, Bakı Metropoliteninin “28 May” stansiyasında Yaşıl və Qırmızı xətlər ayrılacaq. Metropolitenin ümumi şəbəkəsinin 5 xətdən, 76 stansiyadan, 6 elektrik deposundan və 119,1 km uzunluğunda xətlərdən ibarət olması nəzərdə tutulur. Gələcək planlarda 51 yeni stansiyanın inşası və əlavə 84,3 km metro xəttinin çəkilməsi əsas istiqamətlərdəndir.

Dövlət orqanları, eləcə də təhsil və tibb müəssisələrinin iş rejimi dəyişkən iş qrafikinə əsasən təşkil olunacaq.