Ombudsman kilsə, məscid və sinaqoqlara dövlət dəstəyindən danışdı

"Ölkəmizdə fəaliyyət göstərən məscid, kilsə və sinaqoqlara dövlət tərəfindən davamlı olaraq dəstək göstərilməsi, multikulturalizmin mənəvi irsimizi zənginləşdirən bir amil kimi təbliğ edilməsi bu sahəyə mühüm töhfə verir".

Bunu Ombudsman Səbinə Əliyeva Din xadimlərinin II Forumunda çıxışı zamanı deyib.

O bildirib ki, Konstitusiyanın bərabərlik hüququnu təsbit edən 25-ci maddəsinə əsasən, dini mənsubiyyətindən asılı olmayaraq hər kəsin hüquq və azadlıqlarının bərabərliyi təmin edilir:

"Bununla yanaşı milli qanunvericilikdə insan ləyaqətini alçaldan və ya insanpərvərlik prinsiplərinə zidd olan dinlərin, dini cərəyanların yayılması və təbliği qadağan olunub".

Ombudsman vurğulayıb ki, dini mənsubiyyətlə bağlı qeyd edilənlər Azərbaycanda yalnız qanunvericilik səviyyəsində deyil, real həyatda da müsbət formada tətbiqi müşahidə edilən məsələlərdir.