Ombudsmanların Beynəlxalq Bakı Sammiti süni intellekt dövrünün çağırışlarını gündəmə gətirdi

Ombudsmanların Beynəlxalq Bakı Sammiti keçirilir.

30-a yaxın ölkədən ombudsmanları, beynəlxalq təşkilatların nümayəndələrini və ekspertləri bir araya gətirən Sammit süni intellekt dövründə insan hüquqları, imkanlar, risklər və məsuliyyətlər mövzusuna həsr olunub.

Açılış mərasimində çıxış edən ombudsman Səbinə Əliyeva bildirib ki, Prezident İlham Əliyevin insan hüquqlarının qorunması sahəsinə göstərdiyi diqqət bu istiqamətin dövlət siyasətinin mühüm prioritetlərindən biri olduğunu göstərir.

Tədbirdə ombudsman institutunun vətəndaşlarla dövlət qurumları arasında mühüm körpü rolunu oynadığı, insan hüquqlarının qorunması sahəsində qanunvericiliyin müasir çağırışlara uyğun təkmilləşdirilməsinin vacibliyi qeyd olunub. Beynəlxalq təşkilatların nümayəndələri süni intellektdən istifadənin etik prinsiplər əsasında tənzimlənməsinin əhəmiyyətini diqqətə çatdırıblar.

Sammit işini panel sessiyalarla davam etdirib. Müzakirələrdə rəqəmsal məkanda hüquqların qorunması, məlumatların təhlükəsizliyi, dezinformasiyaya qarşı mübarizə, süni intellektin əmək bazarına təsiri, eləcə də şəffaflıq və bərabərlik prinsipləri ön plana çıxarılıb.

Tədbirin yekununda isə süni intellekt və insan hüquqları üzrə Bakı Bəyannaməsinin qəbul olunması nəzərdə tutulub.