Onları Xocalı faciəsindən bir neçə il sonra qətlə yetiriblər | Orxan Rzayev

Xocalıdakı kütləvi məzarlıqdan qalıqları aşkarlanan şəxslər 1992-ci ildə Xocalı faciəsi zamanı deyil, ondan bir neçə il sonra qətlə yetirilib.

Bu barədə Baş Prokurorluğun Kriminalistika şöbəsinin rəisi Orxan Rzayev deyib.

Bu isə ondan xəbər verir ki, əsir götürülən soydaşlarımız illərlə amansız işgəncələrə məruz qalıb, vəhşicəsinə qətlə yetirilib və qeyri-insani şəkildə dəfn ediliblər.

Ermənilər azərbaycanlılara qarşı insanlıq əleyhinə cinayətlər törətməklə həm də beynəlxalq humanitar hüquq normalarını pozublar. Bu isə sözügedən ölkənin beynəlxalq hüquqi məsuliyyətə cəlb olunması üçün hüquqi əsas yaradır.

Qeyd edək ki, torpaqlarımız işğaldan azad ediləndən sonra həmin ərazilərdə onlarla kütləvi məzarlıq aşkarlanıb, yüzlərlə insan meyitinin qalıqları çıxarılıb. Bütün bunlar erməni cinayətlərinin bariz nümunəsi, xalqımızın isə uzun illər necə amansız düşmənlə üz-üzə qaldığının göstəricisidir.