Overçuk dəmir yoluna kimin nəzarət edəcəyini açıqladı

“Biz Azərbaycan, Ermənistan və Rusiya Baş nazirlərinin müavinlərindən ibarət üçtərəfli işçi qrupu formatında görüşdük və nəticədə hərtərəfli sənəd formalaşdırıldı”.

Bu barədə Rusiya Federasiyasının Baş nazirinin müavini Aleksey Overçuk bildirib. O bəyan edib ki, regionda nəqliyyat əlaqələrinin açılması Arazdəyən-Culfa-Mehri-Horadiz marşrutu ilə gedəcək dəmir yolunun bərpası ilə başlayacaq və tərəflərin suverenliyinə hörmət əsasında əsas yanaşmaları müəyyənləşdirəcək.

A.Overçuk Azərbaycanla Ermənistan arasında sərhədi keçmə qaydasına da münasibət bildirib.

“Bu yolun ayrı-ayrı hissələri hər bir ölkənin yurisdiksiyasında olacaq. Belə ki, bu yola münasibətdə Azərbaycanda Azərbaycan qanunvericiliyi, Ermənistanda isə Ermənistan qanunvericiliyi tətbiq olunacaq. Lakin iki dövlət arasında olan münasibətləri nəzərə alaraq, bütün bunlar şərtləndirilməlidir. İki ölkə sərhədində hələ də silahlı toqquşmalar baş verir və insanlar ölür”, – deyən A.Overçuk vurğulayıb ki, Azərbaycan və Ermənistan arasında sülhə alternativ yoxdur.

Onun sözlərinə görə, sülhə nail olmağın ən yaxşı variantı insanların qarşılıqlı əlaqədə olması və ümumi yolun qurulması üçün bütün imkanları açmaqdır.