Paşinyan üçtərəfli bəyanatı niyə təkzib edir?

Ermənistanın Baş naziri yenə də Azərbaycanın səbir kasasını daşırmağa çalışır.

Belə ki, Nikol Paşinyan Vətəndaş Müqaviləsi Partiyasının təşəbbüs qrupunun iclasında çıxışı zamanı bildirib ki, 3 tərəfli bəyannamədə Zəngəzur dəhlizi ilə bağlı heç bir bənd yoxdur və Rusiyanın Ermənistanın hansısa ərazisində kommunikasiyaların təhlükəsizliyini təmin etməsi ilə bağlı heç yerdə qeyd yoxdur. O, hətta bir qədər irəliyə gedərək Üçtərəfli bəyanatda “Zəngəzur dəhlizi” ifadəsini tapana pul mükafatı da vəd edib.

Ermənistanın hökumət başçısının bu açıqlamasını qarşılıqlı etimad mühitinin yaranmasına çalışıldığı bir ərəfədə sülh danışıqlarına zərbə kimi qiymətləndirmək olar.

Millət vəkili Hikmət Məmmədov bildirib ki, N.Paşinyanın son açıqlamaları 3 tərəfli bəyanatın etibarsızlaşdırılması kimi qəbul edilməlidir:

“Zəngəzur dəhlizinin açılmasına Ermənistan mane olacaqsa, Azərbaycan Prezidentinin qeyd etdiyi kimi, Ermənistan əbədi olaraq blokadada qalacaq. Ona görə mən düşünürəm ki, bu N.Paşinyanın Zəngəzur dəhlizinin açılmasına qarşı olan mövqeyinin son cəhdləridir.

Nəticə etibarilə bu dəhlizin açılmasına qarşı Ermənistan duruş gətirə bilməyəcək. Çünki əgər belə olacaqsa, Azərbaycan N.Paşinyanın təklif etdiyi digər 4 mümkün alternativ yolun heç birini açmayacaq. Belə olanda Naxçıvan blokada vəziyyətində nə qədər ki, qalacaq, bir o qədər də Ermənistan blokadada qalacaq. Çünki Azərbaycan üzərindən üçüncü ölkələrə çıxış əldə edə bilməyəcək”.