Paşinyan Zəngəzurdan keçən yola nəzarətdən danışdı | Ermənilər seçim qarşısında qaldı

“2026-cı ilin iyununda keçiriləcək parlament seçkilərində Ermənistan vətəndaşları sülhün olması və ya olmaması arasında seçim etməli olacaqlar”.

Bunu Ermənistanın Baş naziri Nikol Paşinyan avqustun 21-i keçirilən hökumətin iclasından sonra jurnalistlərin suallarını cavablandırarkən deyib. O bildirib ki, seçkidə Ermənistan vətəndaşları seçim etməlidirlər.

“Mən “sülh və ya müharibə” demək istəmirəm, daha yumşaq deyəcəyəm: sülh və ya sülhün olmaması. Məhz buna görə də bazar ertəsi etdiyim müraciətimdə aydın şəkildə bəyan etdim ki, bərqərar olmuş sülh gündəlik qayğıya ehtiyac duyur və bu, vətəndaşlar da daxil olmaqla, hər birimizin birlikdə həll etməli olduğumuz bir vəzifədir”, ‒ deyə Nikol Paşinyan qeyd edib.

O həmçinin vurğulayıb ki, Ermənistan Azərbaycanla sülh sazişinin imzalanması üçün hər gün işləyir, işləyib və işləyəcək.

Zəngəzurdan keçən yola nəzarət mövzusuna toxunan Baş nazir vurğulayıb ki, Ermənistan ‒ ABŞ birgə şirkəti Zəngəzurdan keçən yola nəzarət etməyəcək, sadəcə, onu idarə edəcək.

Paşinyanın sözlərinə görə, bu marşrutda biznes idarəetməsi həyata keçiriləcək.

Baş nazir onu da əlavə edib ki, Ermənistan ‒ Türkiyə sərhədinin açılması sülhə şərait yaradacaq.

“Ümid edirəm və əminəm ki, bir gün Ermənistan ‒ Türkiyə sərhədi açılacaq. Sülh şəraitində hər kəs turist kimi bütün yerlərə səfər edə biləcək”, ‒ deyə Paşinyan bildirib.