Paşinyanı devirmək üçün güclər birləşir | Aksiyaların sonu necə olacaq?

Ermənistanda Tavuş yeperxiyasının arxiyepiskopu Baqrat Qalstyanın başında dayandığı etirazlar günlərdir davam edir.

Müxalifət hələ ki istədiyinə nail ola bilməsə də, bu, son illər ölkədə baş tutan ən böyük aksiyalardan biridir.

Müxalifətin hökuməti böhtan yağışına tutması Baş nazir Nikol Paşinyanla yanaşı, Erməni Apostol Kilsəsinin rəhbəri 2-ci Qareginin də nüfuzuna da ciddi təsir etməkdədir. Düzdür, Qaregin də ara-sıra Paşinyanı tənqid edib və daha çox revanşist mövqeyi ilə seçilir. Ancaq katolikos əksər məsələlərdə bitərəf mövqedə qalır, hökumətlə açıq siyasi mübarizəyə girmir.

Hazırda Ermənistan daxilində bir çox qüvvə və ayrı-ayrı siyasi fəallar tərəfindən aksiyaya dəstək çağırışları edilir. Həmçinin keçmiş prezident Robert Koçaryan, keçmiş müdafiə naziri Seyran Ohanyan, Rusiya yönümlü “Çiçəklənən Ermənistan” partiyası, diaspor və kilsə müxalif keşişin ətrafında toplaşıb. Təbii ki, burada əsas məqsəd yeni hökumət qurularsa, bundan öz mənafeyi üçün istifadə etməkdir.

Yeri gəlmişkən, aksiyalar İrəvandan savayı artıq Ararat vilayətinə də yayılıb. Aksiyalara xaricdən də güclü dəstək verilir. ABŞ və Avropada mövcud olan erməni diasporu öz adamları, keçmiş xarici işlər naziri Vardan Oskanyanın vasitəsilə fəal şəkildə aksiyalara dəstək göstərir.

Oskanyan xaricdən maliyyə kanalları tapmağa çalışır, Paşinyanın devrilməsi üçün təkliflər təqdim edərək təşəbbüsü ələ almağı hədəfləyir. Ancaq aksiyalar hazırda hökuməti devirəcək gücdə deyil. Çünki üsyankar keşiş sadə xalqdan kifayət qədər dəstək ala bilmir. Lakin həm erməni cəmiyyətində, həm də regionda aksiyaların uğurlu olacağı təqdirdə yeni hökumətlə bağlı müzakirələrə də başlanılıb. Ehtimal ki, yeni hökumət fərqli siyasi qrupların təmsilçilərindən ibarət milli birlik formatında ola bilər. Baş nazirliyə ən şanslı namizəd kimi isə Baqrat Qalstyan və ya Robert Koçaryan görünür.