Paşinyanı hansı gələcək gözləyir?

Ermənistanın Baş naziri Nikol Paşinyan sosial media hesablarında tez-tez ölkəsinin keçmiş liderlərini hədəf alır.

Bu dəfə də paylaşdığı statusda Levon Ter-Petrosyan, Robert Koçaryan və Serj Sarkisyanı sərt şəkildə tənqid edib. N.Paşinyanın bu çıxışı Ermənistanda daxili siyasi mübarizəni yenidən gündəmə gətirib. O, keçmiş prezidentləri Qarabağ münaqişəsində məsuliyyətsiz davranmaqda günahlandırır.

Onun sözlərinə görə, Levon Ter-Petrosyan Ermənistanı müharibəyə sürükləyib, sonra qaçıb. Robert Koçaryan Qarabağı müharibəyə cəlb edib, Ermənistana sığınıb. Serj Sarkisyan isə Laçın postunda topladığı pulları öz əyləncəsinə xərcləmək üçün Qarabağdan qaçıb.

N.Paşinyan burada keçmiş liderləri müharibənin başlamasında və davamında günahkar göstərərək öz hökumətini sülh tərəfdarı kimi təqdim edir. Bu ritorika Ermənistan cəmiyyətində dərin parçalanmalara səbəb olur.

Keçmiş liderlər, xüsusilə R.Koçaryan və S.Sarkisyan Qarabağ erməniləri arasında qəhrəman kimi qəbul edilir, amma N.Paşinyan onları korrupsiya və şəxsi maraqlardan çıxış etməkdə ittiham edir.

Paylaşımın ən maraqlı hissəsi, şübhəsiz ki, seçki saxtakarlığı ilə bağlıdır. N.Paşinyan soruşur ki, əgər siz dediyiniz kimi, sülh gətirən lidersinizsə, niyə 1996-cı ildən bəri olan seçkilərdə saxtakarlıq yolu ilə seçilmisiniz?

Bu sual Ermənistanın postsovet dövründəki demokratiya problemlərini gündəmə gətirir. Keçmiş liderlərin ailə üzvləri əsasən Avropa və ya Rusiyada yaşayıb, Qarabağda xidmət etməkdən qaçıblar, halbuki adi ermənilər müharibənin iştirakçısı olublar.

O, sosial bərabərsizliyi və elitanın məsuliyyətsizliyini də ifşa edir. Mütəxəssislər düşünürlər ki, Ermənistan daxilindəki qarşıdurma Azərbaycanla sülh prosesinə zərbə vura bilər. Nəticədə, N.Paşinyanın paylaşımı, sadəcə, tənqid deyil, Ermənistanın keçmişi ilə üzləşmə cəhdidir.