Prezident İlham Əliyevin Türkiyədə rəsmi qarşılanma mərasimi

Fevralın 19-da Türkiyə Prezidentinin Sarayında – Külliyedə Azərbaycan Prezidenti İlham Əliyevin rəsmi qarşılanma mərasimi olub.

İlham Əliyev süvari dəstəsinin müşayiəti ilə Türkiyə Prezidentinin Sarayına gəlib. Sarayın qarşısındakı meydanda İlham Əliyevin şərəfinə fəxri qarovul dəstəsi düzülüb.

Rəcəb Tayyib Ərdoğan İlham Əliyevi qarşılayıb. İlham Əliyevin şərəfinə toplardan yaylım atəşinin müşayiəti ilə Azərbaycanın və Türkiyənin Dövlət himnləri səslənib.

Dövlət başçıları fəxri qarovul dəstəsinin qarşısından keçiblər. İlham Əliyev fəxri qarovul dəstəsini salamlayıb. Fəxri qarovul dəstəsinin rəisi Azərbaycan Prezidentinə raport verib.

Türkiyənin rəsmi şəxsləri İlham Əliyevə, Azərbaycan nümayəndə heyətinin üzvləri Rəcəb Tayyib Ərdoğana təqdim edilib. Sonra rəsmi foto çəkdirilib.