Prezident Qəbələdə TDT-nin Ağsaqqallar Şurasının sədrini qəbul etdi

Azərbaycan Prezidenti İlham Əliyev oktyabrın 6-da Qəbələ şəhərində Türk Dövlətləri Təşkilatının (TDT) Ağsaqqallar Şurasının sədri Binəli Yıldırımı qəbul edib. Səmimi keçən görüşdə, tərəflər TDT-nin fəaliyyətinə göstərilən dəstəyi xüsusi məmnunluqla qeyd ediblər. Qonaq Binəli Yıldırım, Ağsaqqallar Şurasının türk dövlətləri arasındakı əməkdaşlığın daha da inkişaf etdirilməsinə töhfə verməyə davam edəcəyini vurğulayıb. Söhbət zamanı TDT Dövlət Başçıları Şurasının qarşıdan gələn 12-ci Zirvə görüşünün əhəmiyyəti xüsusi qeyd edilib və tədbirin yüksək səviyyədə təşkil olunacağına əminlik ifadə olunub. Eyni zamanda, Azərbaycan və Türkiyə arasında mövcud olan qardaşlıq və strateji müttəfiqlik əlaqələrinin bütün sahələrdə genişləndirilməsi perspektivləri müzakirə edilib.