Prezident və xanımı Kəlbəcərdə "İstisu" zavodunun açılışında iştirak etdilər

Prezident İlham Əliyev və birinci xanım Mehriban Əliyeva Kəlbəcər rayonunda İstisu mineral su zavodunun açılışında iştirak ediblər.

Prezidentin İşlər müdiri Ramin Quluzadə zavod barədə məlumat verib.

Bildirilib ki, “İstisu” mineral su zavodu uzun illər Kəlbəcərin müstəsna keyfiyyəti və sağlamlığa faydaları ilə tanınan termal su yatağından çıxan eyniadlı suyunu 30 illik müddətdən sonra yenidən istehlakçılara təqdim edir.

1976-cı ildən etibarən Kəlbəcər rayonunda “İstisu” mineral suyunun istehsalına başlanılıb. Bununla da unikal və faydalı mineral tərkibə malik “İstisu” təbii mineral suyunun şöhrəti bütün SSRİ ərazisinə yayılıb.

Mənbəyini Azərbaycanın Kəlbəcər rayonunun mənzərəli dağlıq bölgəsində, dəniz səviyyəsindən 1600 metrdən çox yüksəklikdə yerləşən termal su yataqlarından götürən və təbii halda 60°C-dən yuxarı bir temperaturda çıxan “İstisu” mineral suyu regionun təbii xəzinə hesab olunan minerallarla zəngin nadir suyu kimi xarakterizə olunur. Lakin 30 ilə qədər davam edən münaqişə və torpaqlarımızın Ermənistan tərəfindən işğalı ilə əlaqədar uzunmüddətli “İstisu” təbii mineral suyunun istehsalı dayanmışdı. İlham Əliyev tərəfindən 2022-ci il iyunun 26-da “İstisu” mineral su zavodunun təməli qoyulub və 2024-cü ildə işlər tam başa çatdırılıb.