Aİ “müşahidəçi”lərinin sərhəddəki fəaliyyəti ifşa edildi | Anbaan görüntülər yayıldı

Avropa İttifaqının Azərbaycanla sərhəddə yerləşdirilən və kəşfiyyat materialları toplamaqla məşğul olan “müşahidəçi”ləri fəaliyyətlərini davam etdirirlər.

Bununla bağlı Ordu.az yeni görüntülər təqdim edib.

Videogörüntülərdə Zəngilan rayonunun Ağkənd kəndi istiqamətində, Qafan Aeroportunun ərazisinə Sünik kəndi istiqamətindən Aİ-yə məxsus 2 ədəd “Toyota” markalı nəqliyyat vasitəsinin gəlməsi və içindən biri qadın olmaqla 4 nəfər əməkdaşının düşərək ərazilərimizi müşahidə etməsi görünür.

Digər videogörüntülərdə isə Qubadlı rayonu Fətəlitəpə kəndi istiqamətində, Gorus rayonu Kornidzor kəndi ərazisindən 2 ədəd “Toyota” markalı minik avtomobili ilə gələn 5 nəfər əməkdaşın görüntü cihazı ilə ərazilərimizi müşahidə etmələri qeydə alınıb.

Oxşar görüntülər Quşçu Ayrım kəndi istiqamətində sərhəddə, Tbilisi-İcevan magistral yolunda ayrı-ayrı vaxtlarda iki dəfə müşahidə edilib.

Bundan başqa, Aİ-yə məxsus olan 2 ədəd “Jeep” markalı avtomobil sərhədin digər istiqamətində – 30-cu sərhəd-nəzarət istiqamətində dayanıb 5 nəfər şəxsin Azərbaycan ərazisini müşahidə etməsi qeydə alınıb. Bu aktivləşmələr bir daha göstərir ki, təxribat ehtimalı əsassız deyil.

Avropa İttifaqı “müşahidəçi”lərinin erməni hərbçilərlə birgə sərhəd “reydlərini” Ermənistanda revanşist qüvvələrin aktivləşməsi, ölkənin silahlandırılması, danışıqlarda daha qeyri-konstruktiv mövqe tutması kimi qiymətləndirmək olar.

Avropa İttifaqı bununla bir daha nümayiş etdirir ki, Azərbaycan və Ermənistan arasında sülh əldə olunmasında maraqlı deyil. Əksinə, Ermənistanı revanşizmə həvəsləndirir, Azərbaycanla sülh danışıqlarından çəkilməyə sövq edir.