Prezidentin nümayəndəsi İsrail, İran və Ermənistanla əlaqələrdən danışdı

Vaşinqtonda avqustun 8-də ABŞ Prezidenti Donald Trampın iştirakı ilə sülh sazişinin paraflanması Qafqaz regionu üçün onilliklər boyu davam edən düşmənçilik və qanlı münaqişələrdən sonra tarixi bir mərhələdir.

Bunu Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov "I24 News" telekanalına müsahibəsində deyib.

O bildirib ki, bu saziş iki ölkə arasındakı münasibətlərin normallaşmasında çox önəmli bir irəliləyişdir.

"Hazırda bu irəliləyiş sadəcə sazişin paraflanmasıdır, yəni yekun imzalanma deyil. Daha irəli getmək üçün Ermənistanın konkret addımlar atması, xüsusən də Azərbaycan əleyhinə ərazi iddialarını aradan qaldırmaq məqsədilə Konstitusiyasını dəyişdirməsi lazımdır", – deyə E.Əmirbəyov bildirib.

Diplomat ABŞ Prezidenti Donald Trampın şəxsi iştirakı və diplomatik çəkisinin bu nəticənin əldə olunmasında həlledici olduğunu vurğulayıb.

Azərbaycanın vasitəçi rolunun artması, xüsusilə İran və İsrail arasında vasitəçilik barədə E.Əmirbəyov bildirib ki, Azərbaycan 1991-ci ildən müstəqilliyini əldə etdikdən sonra çoxvektorlu xarici siyasət aparır.

"Biz İsrail və İranla münasibətlər də daxil olmaqla qarşılıqlı hörmət və suverenlik prinsiplərinə əsaslanan münasibətlər qururuq", – Elçin Əmirbəyov deyib.

İsrail-Fələstin münaqişəsi ilə bağlı isə E.Əmirbəyov bir daha vurğulayıb ki, 2 dövlətli həll real və davamlı sülh üçün yeganə yoldur. Qlobal idarəçilik məsələsini müzakirə edərkən isə o, BMT Təhlükəsizlik Şurasında islahatın vacibliyini, onu köhnəlmiş hesab etdiyini vurğulayıb.

"Biz qlobal idarəçiliyi müharibə yolu ilə deyil, dialoq yolu ilə dövrümüzə uyğunlaşdırmalıyıq", – deyə E.Əmirbəyov dünyada daha çox əməkdaşlıq və daha az qarşıdurma çağırışı edib.