Qalmaqallı məktub: Beynəlxalq müşahidəçiləri ermənilərin məhkəməsinə cəlb etmək istəyənlər - Baku TV

“Son günlərdə ABŞ Senatında Ed Marki və Şeldon Uaythaus başda olmaqla demokratların lideri Çak Şumer və 27 senatorun imzaladığı məktub diqqətimizi çəkdi. Bu məktubda Azərbaycan rəsmilərinə qarşı qlobal Maqnitski sanksiyalarının tətbiqi, bütün “erməni hərbi əsirləri”nin və separatçı liderlərin azad edilməsi, habelə Bakıdakı məhkəmə proseslərinə beynəlxalq müşahidəçilərin cəlb edilməsi tələb edilir”.

Bunu Milli Məclisin iclasında çıxış edən deputat Kamal Cəfərov deyib.

“Bu davranış Bob Menendez, Adam Şiff, Frank Pallone, Pelosi kimi korrupsioner siyasətçilərin anti-Azərbaycan kursunun davamıdır və yalnız iflasa məhkumdurlar.

Həmin müraciətdə 120 min erməninin Qarabağdan guya məcburi köçürülməsi iddiası ilə çıxış edilərək “etnik təmizləmə” çağırışları səsləndirilir. Fakt ondan ibarətdir ki, ermənilərin Qarabağdan çıxışı beynəlxalq hüquq normalarına uyğun humanitar dəhliz vasitəsilə təmin edilib, könüllü xarakter daşıyıb. Bununla bağlı təkzibolunmaz video fakt və sübutlar var.

Əksinə, Qərbi azərbaycanlıların deportasiyası etnik təmizləmə xarakteri daşıyıb. Onlar unudurlar ki, ermənilərin Qarabağa köçürülməsi də, oradan könüllü köçü də separatizm və beynəlxalq hüququn pozulması zəminində yaranmış münaqişə kontekstində formalaşıb. Ona görə də ermənilərin qayıdış hüququ ilə bağlı iddiaları beynəlxalq hüququn ərazi bütövlüyü prinsipinə ziddir. Bu məsələ yalnız Azərbaycanın ərazi bütövlüyü və suverenliyi çərçivəsində, yəni milli qanunvericilik əsasında mümkündür və ayrıca beynəlxalq hüquqi status daşımır”, – deyə o qeyd edib.