"ATƏT-dən gözləntimiz budur ki..." | Ceyhun Bayramov mina problemindən danışdı - Baku TV

ATƏT mina təhlükəsi məsələsində Azərbaycana dəstək göstərə bilər.

Bunu xarici işlər naziri Ceyhun Bayramov İsveçrə Konfederasiyasının federal xarici işlər naziri, ATƏT-in fəaliyyətdə olan sədri İqnasio Kassis ilə Bakıda keçirilən mətbuat üçün brifinqdə deyib.

"Bizim ölkəmiz üçün ən ciddi məsələlərdən biri məhz işğaldan azad edilmiş ərazilərin minalar və partlamamış sursatlarla çirklənməsidir. 2020-ci ilin müharibəsindən sonra artıq ən son statistikaya görə, 433 nəfər mina qurbanı olub. Burada ölənlər, yaralananlar, həyat və sağlamlıqlarını itirən insanlar var", – nazir qeyd edib.

C.Bayramov bildirib ki, ərazilər azad edildikdən sonra Azərbaycan tamamilə fərqli miqyasda problemlə üzləşib:

"Bu işlərin böyük əksəriyyəti Azərbaycan dövləti tərəfindən, Azərbaycan dövlətinin öz resursları hesabına həyata keçirilir".

Nazir qeyd edib ki, bu sahədə ilk növbədə ANAMA-nın, həmçinin Müdafiə Nazirliyi, Fövqəladə Hallar Nazirliyi və özəl şirkətlərin fəaliyyət göstərdiyini vurğulayıb.

"Ərazidə ən uzunmüddətli münaqişələrdən birinin baş verdiyini, regionun inkişafını, bağlantıları və insanların geri qayıdışını nəzərə alaraq ATƏT-ə üzv ölkələrin minatəmizləmə sahəsində ciddi təcrübəsi və potensialı var", – C.Bayramov deyib.

O əlavə edib ki, Azərbaycanın gözləntisi ATƏT-in bu sahədə daha fəal olması, Azərbaycanda minatəmizləmə layihələrinin icrasını təşkil etməsi və həyata keçirməsidir.