"Azərbaycan xalqına onların salamını çatdırıram" | İrana nələr göndərildi? - Baku TV

Rusiyadan İrana göndərilən üçüncü humanitar yardım karvanı “Cənub–Astara” dövlət sərhədindən buraxılış məntəqəsinə daxil olub. Yardım “Cənub–Astara” gömrük postundan yola salınıb.

7 yük avtomobilindən ibarət karvan gömrük yoxlanışından keçdikdən sonra Şimal–Cənub dəhlizi vasitəsilə İran istiqamətinə keçib.

Ötən gecə 31 vaqondan ibarət və 300 tondan artıq humanitar yük daşıyan qatar da “Astara Dəmir Yolu” gömrük sərhəd buraxılış məntəqəsindən keçərək İrana göndərilib.

Rusiya Fövqəladə Hallar Nazirliyinin (FHN) departament direktoru Dmitri Melnik bildirib ki, Rusiya Prezidentinin göstərişinə uyğun olaraq və Fövqəladə Hallar Nazirliyinin tapşırığı ilə İran xalqına təcili humanitar yardımın çatdırılmasının ikinci mərhələsi başa çatıb:

“Bu yardım partiyası 300 ton müxtəlif növ tibbi ləvazimatdan ibarətdir. Yükün çatdırılması ümumilikdə 4 gün çəkdi. Bu, Rusiya və Azərbaycanın müvafiq qurumlarının birgə səyləri nəticəsində mümkün olub. Bununla əlaqədar Rusiya nazirliklərinin və aidiyyəti qurumların bütün əməkdaşlarına, eləcə də humanitar yardımın operativ şəkildə mənzil başına çatdırılmasına köməklik göstərən azərbaycanlı həmkarlarımıza təşəkkürümü bildirirəm”.