"Azərbaycanla münasibətlər sülh gündəliyinə əsaslanır" | Paşinyandan açıqlama

“Biz daim deməliyik ki, Ermənistan və Azərbaycan arasında sülh artıq təsbit olunmuş faktdır və biz həm də bu vəziyyətlə barışmalıyıq ki, sülh bizim üçün hələ də tanış olmayan bir anlayışdır”.

Bunu Ermənistan Baş naziri Nikol Paşinyan bildirib.

“Ermənistan Respublikası üçün “sülh” nə deməkdir, bu onun üçün tanış anlayış deyil, çünki Ermənistan müstəqilliyinin ilk günündən etibarən münaqişə şəraitində olub. Hətta müstəqillikdən əvvəlki qısa dövrdə belə, əslində, münaqişə mühitində yaşamışıq. Sülh şəraitində yaşamaq, sülhün dəyərlərini dərk etmək və ona uyğun düşüncə tərzi formalaşdırmaq asan məsələ deyil. Bu məsələni həll etmək üçün çox diqqətli olmalıyıq. Bu, sülhə qayğı göstərmək zərurətinin mühüm tərkib hissəsidir. Bərqərar olan sülhə qayğı göstərməliyik ki, o güclənsin, möhkəmlənsin və daha institusional xarakter alsın”, ‒ o qeyd edib.

Paşinyan əlavə edib ki, bu istiqamətdə işlər davam edir, Azərbaycanla danışıqlar diplomatik kanallar vasitəsilə aparılır, müxtəlif səviyyələrdə təmaslar baş verir.

Baş nazir xatırladıb ki, Ermənistan parlamentinin sədri yaxınlarda Azərbaycan Milli Məclisinin spikeri ilə görüşüb, bundan əvvəl isə baş nazir müavinləri səviyyəsində fəaliyyət göstərən işçi qrupların görüşü keçirilib:

“Əslində, indi demək olar ki, hər gün iş aparılır. Əvvəllər bizim Azərbaycanla münasibətlərimiz gündəlik işimizin ayrılmaz hissəsi idi, indi isə fərq ondadır ki, Azərbaycanla sülh bizim gündəlik işimizin ayrılmaz hissəsinə çevrilib”.