"Ermənistan da, Azərbaycan da faydalanacaq" | Senatordan Cənubi Qafqazla bağlı açıqlama

“TRIPP layihəsi Azərbaycanı Naxçıvanla birləşdirəcək, eyni zamanda yeni bir ticarət yolu yaradacaq”.

Bunu ABŞ Senatının Xarici Əlaqələr Komitəsinin üzvü, senator Stiv Dayns Vaşinqtonda "ABŞ Cənubi Qafqazda: Yeni strateji imkanların müəyyənləşdirilməsi" mövzusunda keçirilən konfransda çıxışı zamanı deyib.

Onun sözlərinə görə, Azərbaycan, Ermənistan və digər regional dövlətlər bundan faydalanacaq.

Senator qeyd edib ki, Ata Corc Buşdan indiyədək Amerika Birləşmiş Ştatlarının hər bir prezidenti Azərbaycanla Ermənistan arasında münaqişənin həllini tapmaq üçün sülh təşəbbüslərini irəli sürdü, lakin hamısı uğursuz oldu:

"Bu, Tramp administrasiyasının Cənubi Qafqazda sülh əldə etməyi prioritet hesab etdiyi bir vaxtda baş verdi. Həm Azərbaycan, həm də Ermənistan ABŞ ilə unikal tərəfdaşlıq şəraitində müstəqil gələcəyə doğru üz tutdu".

O həmçinin vurğulayıb ki, bu il avqustun 8-də əldə olunan razılaşmanın açdığı iqtisadi potensial çox əhəmiyyətlidir.

"Azərbaycan-Ermənistan sülh sazişi diplomatik irəliləyişdir, həqiqətən, qarşılıqlı faydalı sülhməramlılıq nümunəsidir. Azərbaycan, Ermənistan və ABŞ daha firavan, vacib və təhlükəsiz gələcəyə doğru addımlayır və çalışır. Bakı dünyanın ən mühüm qaz və neft ixracatçılarından biridir", – deyə Stiv Dayns qeyd edib.