Rusiya hərbçiləri İrəvandan buna görə çıxarıldı | Hərbi baza məsələsinin iç üzü

“Caliber.az” saytı avqustun 2 və 3-də ABŞ Hərbi Hava Qüvvələrinə məxsus 2 təyyarənin İrəvandakı Zvartnots Hava Limanına endiyi barədə görüntüləri paylaşıb.

Bu təyyarədə İranın hərəkətlərini izləyəcək texnika ilə yanaşı, şəxsi heyətin də olduğu bildirilir.

Diqqət çəkməmək üçün ABŞ öz ordusunda xidmət edən erməniəsilli vətəndaşları, həmçinin digər postsovet ölkələrindən olan hərbçilərdən ibarət kontingenti Ermənistana göndərib.

Həmin hərbçilər və texnika Zəngəzur istiqamətində yerləşdirilib.

Qeyd edək ki, Zvartnots Hava Limanını əvvələr Rusiya hərbçiləri qoruyurdu. Lakin Paşinyan hökuməti Rusiya ilə münasibətləri korlamaq bahasına onları oradan çıxara bildi.

Məsələ heç də əvvəldən düşünüldüyü kimi, Ermənistanın Rusiyadan qopub Qərbin hərbi təşkilatlarına inteqrasiya olunması deyilmiş. Əsas səbəb məhz bu hava limanında ABŞ hərbçilərini qəbul etmək olub.

ABŞ və Ermənistan arasında hərbi əməkdaşlığın möhkəmləndirilməsini hədəfləyən “Qardaşlıq – 2024” hərbi təlimləri iyulun 24-də başa çatıb. ABŞ dövlət rəsmilərinin də açıqlamalarında hərbçilərinin Ermənistanı tamamilə tərk etdiyi bildirilir. Bu kadrlar isə deyilənlərin yalan olduğunu göstərir. Ehtimal ki, ABŞ məhz İranı izləmək üçün Ermənistana gedib.

Ancaq Bakının əlində Ermənistanda olan ABŞ hərbçiləri ilə bağlı fakt var və bunu ictimailəşdirir. ABŞ, Ermənistan və İrandan isə səs yoxdur. Çünki deyəcək sözləri yoxdur. Vaşinqton və İrəvan təkzib verə bilmir, İran isə baş verənləri görməzdən gəlir.