Soydaşlarımızın keçirdiyi məclisə basqın edilib

Rusiya polisi azərbaycanlılara qarşı növbəti dəfə qanunsuz və təxribat xarakterli addım atıb.

Belə ki, şimal qonşumuzun hüquq-mühafizə orqanının əməkdaşları Voronej şəhərində yerləşən restoranların birində soydaşlarımızın keçirdiyi məclisə basqın edərək tədbirdə iştirak edənlərin sənədlərini yoxlayıb. Hətta onlardan 50 nəfərə Rusiya Ordusunda hərbi xidmət üçün çağırış vərəqəsi verilib.

Sözügedən hadisə həm ölkə vətəndaşlarının, həm də Rusiyada yaşayan soydaşlarımızın haqlı narazılığına səbəb olub. Bildirilib ki, bu addım qanunsuz və təxribat xarakterli olmaqla yanaşı, həm də Rusiya-Azərbaycan münasibətlərinə kölgə salır.

Qeyd edək ki, bundan əvvəl də Rusiyanın güc strukturu azərbaycanlılara qarşı analoji addım atıb. Oktyabrın 31-də Sankt-Peterburq şəhərində yerləşən restoranların birində azərbaycanlıların toyuna polis basqın edib.