Sülhməramlılardan ermənilərə Azərbaycanın yardımı ilə bağlı təklif

Rusiya sülhməramlı qüvvələri Bakıdan göndərilən 40 ton unun Xankəndiyə buraxılmasını təklif edib.

Lakin Qarabağdakı erməni quldurları onların bu təklifini qəbul etməyib. Bu barədə Qarabağdakı separatçıların liderlərindən David İşxanyan keçirdiyi mətbuat konfransında məlumat verib.

Onun sözlərinə görə, Bakıdan göndərilən humanitar yükün Xankəndiyə buraxılması məsələsi Rusiya sülhməramlılarının komandanlığı ilə müzakirə olunub, lakin danışıqlar nəticə verməyib.

Eyni zamanda D.İşxanyan Rusiya sülhməramlı kontingentinin yeni komandanının Qarabağa yeni gəldiyini və bu səbəbdən də vəziyyətlə yaxından tanış olmadığını bildirib.

Qeyd edək ki, avqustun 29-da Azərbaycan Qızıl Aypara Cəmiyyəti tərəfindən Qarabağda yaşayan erməni əsilli vətəndaşlar üçün 40 ton un göndərilib. Hazırda unla yüklənmiş avtomobillər Rusiya sülhməramlı qüvvələrinin Ağdam-Xankəndi yolu üzərində yerləşən postunda gözləyir.