Tanınmış iqlim fəalının saxlanılmasından narahatıq | Azərbaycan XİN

Azərbaycan Xarici İşlər Nazirliyi (XİN) tanınmış iqlim fəalının saxlanılması ilə bağlı Niderland hakimiyyətinə çağırış ünvanlayıb.

Bu barədə nazirliyin “X” hesabında paylaşım edilib.

Paylaşımda "Tanınmış iqlim fəalı Qreta Tunberqin Haaqada dinc nümayiş zamanı saxlanılmasından narahatıq. COP29-un sədri kimi biz Niderland hakimiyyətini iqlim etirazçılarının ifadə azadlığına hörmət etməyə və saxlanılanları azad etməyə çağırırıq", – deyə bildirilib.

Qeyd edək ki, Niderland polisi isveçli iqlim fəalı Qreta Tunberqi Haaqada keçirilən etiraz aksiyasında saxlayıb. Nümayişçilər Niderlandın siyasi paytaxtını Amsterdam, Rotterdam və Utrext də daxil olmaqla digər böyük şəhərlərlə birləşdirən A12 magistral yolunu bağlamağı planlaşdırıblar. Polis bir neçə yüz fəalı magistral yola çıxmaq istəyəndə saxlayıb.

Daha sonra etirazçılar yaxınlıqdakı yolları bağlamaq istəyiblər və buna cavab olaraq təhlükəsizlik qüvvələri etirazçıları saxlayıb. Q.Tunberq də onların arasında olub.

Ancaq buna baxmayaraq, aksiya davam edib. İsveçli fəalın iki saat sonra geri qayıdıb Haaqanın hərəkətli küçələrindən birində piyada keçidində etiraz əlaməti olaraq oturan bir qrup aksiyaçıya qoşulması təəccüblə qarşılanıb. Təxminən 15 dəqiqə sonra o, yenidən polis tərəfindən tutulub.