Tramp bu dəfə rəqibini təhdid edir | Ukrayna ilə bağlı yeni plan var?

ABŞ-nin qlobal siyasətdə əsas prioritetlərindən biri hər zaman Çinlə rəqabət aparmaq və onun artan gücünü məhdudlaşdırmaq olub. Donald Tramp hakimiyyətinin siyasi kursu da bu mənada istisna deyil.

Donald Trampın Ukrayna münaqişəsinə yanaşması Co Bayden administrasiyasının siyasətindən kəskin şəkildə fərqlənir. O, dəfələrlə bildirib ki, prezident olsa, münaqişəni 24 saat ərzində həll edəcək.

Ekspertlər düşünürlər ki, Donald Trampın planı əsasən Rusiya ilə kompromis əldə edərək Ukraynaya dəstəyin azaldılması və Moskvanın müəyyən tələblərinin qəbul edilməsidir.

D.Trampın bu yanaşması ABŞ-nin əsas rəqibi kimi Çinə daha çox diqqət yetirməsinə şərait yarada bilər. Çünki hazırda Ukraynaya verilən hərbi və maliyyə dəstəyi ABŞ-nin resurslarını tükəndirir və Vaşinqtonun eyni anda həm Rusiya, həm də Çinlə rəqabət aparmasını çətinləşdirir. Artıq D.Tramp Administrasiyası Rusiya tərəfi ilə telefon əlaqəsinə keçib, yaxın zamanlarda da tərəflərin görüşü nəzərdə tutulub.

Donald Trampın Rusiya-Ukrayna münaqişəsini tez bir zamanda bitirib Çinə qarşı mübarizəyə fokuslanmaq istəməsi ABŞ-nin strateji hədəflərinə uyğun olsa da, mütəxəssislərin fikrincə, bu planın həyata keçirilməsi çətin olacaq.

Rusiya ilə Ukrayna arasındakı müharibəni sürətlə dayandırmaq üçün ciddi güzəştlər tələb oluna bilər, bu isə ABŞ-nin beynəlxalq nüfuzu baxımından zərərlidir.

Digər tərəfdən Çin artıq uzunmüddətli mübarizəyə hazırlaşır və ABŞ-nin onu zəiflətmək planlarına qarşı müqavimət göstərməyə davam edəcək. Son nəticədə, D.Trampın bu strategiyasının uğuru onun diplomatik bacarığından, ABŞ-nin iqtisadi və hərbi imkanlarından, həmçinin Çin və Rusiyanın verəcəyi cavablardan asılı olacaq.