Türkiyə mallarının Mərkəzi Asiya və Çinə ixracı bu halda sürətlənəcək | Kamran Cəfərovdan açıqlama

Regionda baş verən son hadisələrlə bağlı Rusiya “Teleqram” kanallarında isterika başlayıb və bu isterika Kremldə olan əhvali-ruhiyyənin göstəricisidir.

Bu barədə politoloq Kamran Cəfərov qeyd edib.

O, 1 milyondan çox izləyicisi olan “Rıbar” kanalının yazısını paylaşıb:

“Zəngəzur dəhlizi uzaqda deyil. Türkiyə Prezidenti Rəcəb Tayyib Ərdoğan Zəngəzur dəhlizinin açılmasını “geostrateji inqilab” və “Orta Dəhlizin əsas xətti” adlandırıb. Türkiyə Prezidenti bildirib ki, Zəngəzur vilayətindən keçməsi nəzərdə tutulan potensial dəhliz Türkiyəni, Azərbaycanı və Naxçıvanı birləşdirəcək, bu isə Türkiyə mallarının Mərkəzi Asiya və Çinə ixracını sürətləndirəcək. Çindən Avropaya gedən yüklər də Türkiyə üzərindən keçməyə başlayacaq.

R.T.Ərdoğan qeyd edib ki, əvvəlcə Ermənistanda Zəngəzur dəhlizinə qarşı çıxırdılar, lakin indi İrəvan iqtisadi inteqrasiya məsələsinə daha çevik yanaşma sərgiləyir. Bu, Rusiya üçün təhlükəlidir: Türkiyə Zəngəzur vasitəsilə Turan dəhlizi ideyası ilə güc proyeksiyası həyata keçirir. Bu isə Ankaranın və potensial olaraq NATO-nun liderliyi ilə yeni geosiyasi blokun yaranmasına zəmin yaradır.

Cənubi Qafqazda regional kommunikasiyaların açılması və onların Rusiyanın nəzarətindən kənarda qalması Moskvanın bölgədəki təsir gücünü ciddi şəkildə zəiflədə, hətta sıfra endirə bilər. Bu isə postsovet məkanında Rusiyanın ən böyük strateji məğlubiyyətlərindən birinə çevrilə bilər”.