Türkiyənin milli müdafiə nazirinin müavini prezidentin müvafiq sərəncamı ilə təltif edildi

Müdafiə naziri Zakir Həsənov Azərbaycanda işgüzar səfərdə olan Türkiyə milli müdafiə nazirinin müavini Şuay Alpayın rəhbərlik etdiyi nümayəndə heyəti ilə görüşüb.

Görüşdən əvvəl türkiyəli qonaqlar Fəxri xiyabanda ümummilli lider Heydər Əliyevin və akademik Zərifə Əliyevanın məzarlarını, həmçinin Şəhidlər xiyabanı və Türk Şəhidliyini ziyarət ediblər.

İki ölkə arasında ikitərəfli əlaqələrin dostluq və qardaşlıq münasibətləri üzərində qurulduğunu qeyd edən müdafiə naziri hərbi əməkdaşlığın daha da genişləndirilməsi baxımından bu cür görüşlərin vacibliyini xüsusi vurğulayıb.

Özünün də Azərbaycanın bir övladı olduğunu qeyd edən Şuay Alpay qarşılıqlı inam, etimad və dəstəyə əsaslanan, uğurla inkişaf edən Azərbaycan-Türkiyə hərbi əməkdaşlığının hazırkı vəziyyətindən məmnunluğunu bildirib.

Müdafiə naziri Azərbaycan Prezidentinin müvafiq Sərəncamı ilə təltif edilən Şuay Alpaya “Azərbaycan Xalq Cümhuriyyətinin 100 illiyi” yubiley medalını təqdim edib.

Sonra türkiyəli nümayəndə heyəti müdafiə nazirinin birinci müavini – Azərbaycan Ordusunun Baş Qərargah rəisi Kərim Vəliyev və müdafiə nazirinin müşaviri general-polkovnik Bəxtiyar Ersayla görüşüb.

Keçirilən görüşlərdə Türkiyədə istehsal olunan müxtəlif növ uçuş vasitələrinin modelləri təqdim olunub, qarşılıqlı hədiyyə mübadiləsi aparılıb.