Ukrayna və Rusiya müharibəsinin nəticələri | Tofiq Zülfüqarovdan mühüm açıqlama

Azərbaycanın sabiq xarici işlər naziri Tofiq Zülfüqarov sosial şəbəkədə geniş paylaşım edərək Rusiya-Ukrayna müharibəsinin nəticələrinə dair mövqeyini açıqlayıb.

Onun fikrincə, Ukrayna bu müharibənin ilk mərhələsində artıq qalib gəlib, çünki işğal olunmuş ərazilərin azadlığı ölkənin milli kimliyinin əsas elementi kimi qəbul olunub.

T.Zülfüqarov yazıb:

“Alyaska, o nəyi göstərdi… Ukrayna ilk müharibəni artıq qazanıb. Niyə ilk deyirəm? Çünki işğal olunmuş ərazilər, daha doğrusu, onların azad olunması ölkənin milli identikliyinin bir hissəsinə çevrilib.

Rusiya isə nəyi nəzarətdə saxlaya biləcəyindən asılı olmayaraq elan etdiyi məqsədləri hətta böyük itkilər bahasına, o cümlədən reputasiya itkisinə baxmayaraq, ilk müharibədə uduzub.

Rusiya rəhbərliyi danışıqlarda hansısa güzəştlərə nail olsa belə, siyasi “luzer” imicindən yaxa qurtara bilməyəcək. Ölkəni daimi “pis oğlan”a çevirmək, sonsuz “SVO” aparmaq və hətta Azərbaycanla Qazaxıstanı yeni “SVO”larla qorxutmaq cəhdləri panikanın göstəricisindən başqa bir şey deyil.

Tez və ya gec vəziyyəti dondurmaq cəhdi uğurla nəticələnəcək və o zaman əsl siyasi risk başlayacaq. Bütün siyasi elita, bütün təbliğat maşını həm özlərinə, həm də hamıya Rusiyanın qalib gəldiyini sübut etməyə çalışacaq. Amma bu “Pirr qələbəsi” idarəçilikdə kollaps prosesini, hakimiyyətin tranzitini və hətta ölkənin parçalanmasını sürətləndirə bilər”.

Sabiq nazirin fikrincə, Kreml indi hansısa addımları atsa da, artıq strateji məğlubiyyət qaçılmazdır. Onun sözlərinə görə, Moskva özünü qalib kimi göstərməyə çalışsa da, əslində, bu proses Rusiyanın daxilində daha dərin siyasi və idarəçilik böhranının başlanğıcına çevrilə bilər.