Ukraynanın Bakıdakı səfiri Azərbaycana təşəkkür etdi

Daha 30 ukraynalı uşaq Azərbaycana gətirilib.

Bu barədə Ukraynanın Azərbaycandakı səfiri Yuri Qusyev eks hesabında yazıb.

Onun sözlərinə görə, reabilitasiya və istirahət proqramından yararlanmaq üçün İrpen, Marqanets və Odessa bölgələrindən 30 uşaq Azərbaycana gəlib.

Diplomat xatırladıb ki, artıq 400-ə yaxın ukraynalı uşaq Azərbaycanda bu proqramdan faydalanıb. Səfir bu təşəbbüsə görə Azərbaycan rəhbərliyinə və xalqına öz minnətdarlığını bildirib.

Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyindən isə bildirilib ki, ölkəmizə gətirilən ukraynalı uşaqlar Qəbələ Uşaq Reabilitasiya Mərkəzində reabilitasiya xidmətlərinə cəlb olunacaq, orada tibbi və sosial-psixoloji reabilitasiya xidmətləri ilə təmin olunacaqlar. Uşaqların asudə vaxtlarının səmərəli təşkilinin və Azərbaycanın mədəni irsi ilə tanışlıq məqsədilə Qəbələ və ətraf rayonlarda olan gəzməli-görməli yerlərə, tarixi abidələrə ekskursiyalar təşkil olunacaq.