Vardanyanın "Naxçıvan xəyalı" ortaya çıxdı | Bu, Azərbaycana qarşı...

Ruben Vardanyanın Xankəndidəki iş otağında “Naxçıvan atlası” aşkarlanıb və araşdırılması üçün “Azərbaycan Kartoqrafları” İctimai Birliyinə təqdim olunub.

Bu barədə “Report”a İctimai Birliyin sədri Müqabil Bayramov məlumat verib.

O bildirib ki, sözügedən atlası 2012-ci ildə Erməni Memarlıq Fondu nəşr edib. Burada yer alan xəritələr başdan-ayağa saxtakarlıqlar üzərində qurulub.

“Atlasda iddia olunub ki, guya Naxçıvan daim erməni dövlətlərinin və knyazlıqlarının tərkibində əyalət olub. Bu xəritələr Azərbaycana qarşı ərazi iddialarıdır. Atlasda ilk xəritə guya yunan mütəfəkkiri Ptolomeyin II əsrdə yazdığı “Coğrafiya” əsəri əsasında tərtib olunub və orada dırnaqarası Böyük Ermənistandakı yer adları erməni toponimləri ilə verilib. Ancaq elmi ictimaiyyətə çoxdan məlumdur ki, Ptolemeyin “Coğrafiya” əsəri günümüzə gəlib çatmayıb, əsərin orijinalı IV əsrdə itib”, – deyə ictimai birlik sədri bildirib.

Müqabil Bayramov onu da qeyd edib ki, atlasda saxtalaşdırılmış bir sıra xəritələrdə Naxçıvan ərazisi heç bir əsas olmadan qırmızı xətlərlə işarələnib:

“Bu atlas Azərbaycana qarşı ərazi iddialarının guya tarixi legitimliyini saxtakarlıqlarla əsaslandırmaq üçün ucuz təbliğat materialıdır. Kartoqrafiya ciddi sahədir, onu siyasi oyunbazlığın alətinə çevirmək olmaz”.