Xaçatryan həbs edildi | Arutyunyanın qardaşı İrəvanda dava saldı

Ermənistanda Aramus kəndində yerləşən restoranların birində baş verən atışmada Qarabağdakı keçmiş qondarma rejimin rəhbəri Araik Arutyunyanın qardaşı Armen Arutyunyan da olub.

Bu barədə yerli media məlumat yayıb. Xəbərə görə, Qarabağdan İrəvana könüllü köçən erməniyə məxsus obyektdə masa arxasında qondarma rejimin süqutu müzakirə edilib.

General-leytenant Tiran Xaçatryan buna görə Baş nazir Nikol Paşinyanla birlikdə törtöküntülərin lideri Araik Arutyunyanı da günahlandırıb. Söhbət zamanı qondarma rejimin liderinin qardaşı və Qarabağdan könüllü olaraq İrəvana köçən ermənilər həbsdə olan A.Arutyunyanı müdafiə etməyə başlayıblar və bu da nəticədə davaya səbəb olub.

Nəşr qeyd edib ki, həmin gün odlu silahdan istifadə edilməyib. Hadisə bir neçə gün sonra baş verib. Belə ki, masa arxasında dava edənlər T.Xaçatryanı daha sonra söhbət etmək üçün görüşə çağırıblar və bu zaman 4 nəfər ona hücum edib. O da özünümüdafiə məqsədilə havaya atəş açıb.

Xatırladaq ki, insidentlə bağlı Ermənistan Ordusunun Baş Qərargah rəisinin keçmiş müavini, general-leytenant Tiran Xaçatryan iki ay müddətinə həbs edilib.