Xaçmaz rayonunda “Qərbi Azərbaycan İrsi” kitabının I cildinin təqdimat mərasimi

Xaçmazda “Qərbi Azərbaycan İrsi” kitabının I cildinin təqdimatı olub.

Tədbir iştirakçıları əvvəlcə Ümummilli Lider Heydər Əliyevin abidəsi önünə gül dəstələri düzüb, əziz xatirəsini ehtiramla yad ediblər.

Tarix-Diyarşünaslıq Muzeyində keçirilən tədbirdə Ulu Öndər Heydər Əliyevin və şəhidlərimizin xatirəsi bir dəqiqəlik sükutla yad edilib.

Rayon İcra Hakimiyyətinin başçısı Elnur Rzayev bildirib ki, müxtəlif dövrlərdə soydaşlarımıza qarşı həyata keçirilən deportasiya nəticəsində onlara məxsus məscidlər və qəbiristanlıqlar kütləvi şəkildə dağıdılıb, yer adları dəyişdirilib. Deportasiya siyasətinin son dalğası nəticəsində 300 minə yaxın insan öz dədə-baba torpaqlarından məcburi şəkildə çıxarılıb. “Qərbi Azərbaycan İrsi” kitabı təkcə tarixə işıq salmaqla kifayətlənmir, həm də beynəlxalq hüquq qarşısında məsuliyyət daşımalı olan bir prosesin sənədləşdirilmiş sübutudur.

Qərbi Azərbaycan İcması İdarə Heyəti sədrinin müavini, Milli Məclisin deputatı Hikmət Babaoğlu kitab haqqında ətraflı məlumat verib.

O qeyd edib ki, bu nəşr Qərbi Azərbaycanla bağlı aparılan fundamental araşdırmaların ilk mərhələsidir. Kitab “Çikaqo 17” elmi üslubunda hazırlanıb və Azərbaycan, rus, ingilis dillərində nəşr edilib.

Çıxış edənlər belə tədqiqatların beynəlxalq ictimaiyyətə təqdim olunmasının zəruriliyini vurğulayıblar.

Tədbirdə həmçinin “Qərbi Azərbaycan İrsi” silsilə nəşri ilə bağlı hazırlanan videoçarx nümayiş olunub.