Xocalıda separatçıların azərbaycanlı əsirləri saxladığı tikili tapıldı

Erməni işğalından azad olunan Xocalı rayonunun Malıbəyli kəndində azərbaycanlı əsir və girovların saxlanıldığı tikili aşkarlanıb.

“Report” xəbər verir ki, işğaldan əvvəl – 1992-ci ilədək yaşayış məntəqəsinin ərazisindən keçən Ağvan çayının sahilində qədim su dəyirmanı və onun yardımçı binası olub.

İşğal dövründə separatçılar oranı azərbaycanlı əsir və girovları qanunsuz saxlama yerinə çeviriblər. Bunun üçün dəyirmanın yardımçı tikilisinin qapı və pəncərələrinə dəmir barmaqlıqlar vurulub, üzərinə qalın beton tökülüb. Eyni zamanda içəridə dəmir arakəsmələr yerləşdirərək qəfəs formasına salıblar.

Bundan başqa, ermənilər əsir və girovlara nəzarət edənlər üçün ayrıca otaq da yaradıblar. Tikilidə aşkarlanan izlər orada azərbaycanlı əsirlərin saxlanıldığını, onlara işgəncələr verildiyini deməyə ciddi əsas yaradır.

Xatırladaq ki, Azərbaycan Ordusunun 2023-cü il sentyabrın 19-20-də keçirdiyi antiterror tədbirləri zamanı kənd işğaldan azad edilib.