Məcnun Qadir oğlu Məmmədov 1983-cü il sentyabrın 15-də Zəngilan rayonunun Mincivan qəsəbəsində anadan olub, əslən Cəbrayıl rayonu Yuxarı Məzrə kəndindəndir. 2023-cü il aprelin 14-də Prezident İlham Əliyevin sərəncamı ilə Azərbaycan Respublikasının kənd təsərrüfatı naziri təyin edilmişdir.
Təhsili
Məmmədov 2000-2004-cü illərdə Azərbaycan Dövlət İqtisad Universitetində Mühasibat uçotu və Audit ixtisası üzrə bakalavr təhsili almış, sonra Pakistanın Lahor İdarəetmə Elmləri Universitetində biznesin idarə edilməsi üzrə magistr (MBA) təhsilini davam etdirmişdir. 2017-ci ildə ABŞ-da SABIT proqramı çərçivəsində Aqrobiznesdə İnnovasiya və Effektivlik mövzusunda təlim keçmiş, 2022-ci ildə isə Hollandiyanın Wageningen Universiteti ilə Tilburg Universitetinin birgə "Qida və Aqrobiznesdə İdarəetmə" magistr proqramına başlamışdır.
Karyerası nazirlikdən əvvəl
Əmək fəaliyyətinə "Deloitte & Touche" və "ABN AMRO Bank Kazakhstan" kimi beynəlxalq şirkətlərdə başlayan Məmmədov sonradan "AER" MMC-də, "Paşa Holdinq"ə bağlı "PMD Group" şirkətində müxtəlif rəhbər vəzifələrdə çalışmışdır. Təyinatdan əvvəl o, bağçılıq sahəsində fəaliyyət göstərən "Grand-Agro" MMC-nin, eləcə də Azərbaycanın ən böyük aqrar-qida şirkətlər qrupundan biri olan "Agro Food Investments" (AFİ) şirkətinin rəhbəri olmuşdur.
Nazir kimi fəaliyyəti
Nazirlik kollektivinə təqdim olunarkən qeyri-neft sektorunun, xüsusilə kənd təsərrüfatının ölkə iqtisadiyyatındakı əhəmiyyəti vurğulanmışdır. Məmmədov ingilis, türk və rus dillərini bilir, evlidir və iki övladı var.