“Copilot Health” adlı yeni xidmət növü təqdim edildi

"Microsoft" korporasiyası süni intellekt əsaslı yeni tibbi xidməti – "Copilot Health" alətini təqdim edib.

Bu barədə "The Wall Street Journal" nəşri məlumat yayıb.

Tətbiq "Microsoft Copilot" ekosisteminin bir hissəsi olacaq.

Yeni xidmət istifadəçilərə öz razılıqları əsasında tibbi məlumatlarını sistemə inteqrasiya etməyə imkan verəcək. Süni intellekt tibbi kartları, analiz nəticələrini, qəbul edilən dərmanlar haqqında məlumatları, həkim qeydlərini, həmçinin "Apple Watch" və "Fitbit" kimi cihazlardan daxil olan göstəriciləri analiz edə biləcək.

Toplanan məlumatlar əsasında çat-bot istifadəçinin simptomları və ümumi sağlamlıq vəziyyəti barədə fərdi tövsiyələr hazırlayacaq. İstifadəçi şəxsi məlumatlarını sistemə yükləməzsə, xidmət yalnız ümumi tibbi məsləhətlər təqdim edəcək.

Şirkətdən bildirilib ki, təhlükəsizlik məqsədilə bütün məlumatlar şifrələnəcək və tətbiqin digər hissələrindən tamamilə təcrid olunmuş şəkildə saxlanılacaq. İstifadəçilər öz tibbi məlumatlarını istədikləri zaman idarə edə və ya silə biləcəklər.

Xidmətin istifadəyə verilməsi ilkin mərhələdə ABŞ-də başlayacaq. Şirkət rəsmiləri bu alətin xüsusilə xroniki xəstəliklərdən əziyyət çəkən insanlar üçün faydalı olacağını vurğulayıblar.