Notbuklarla bağlı ən çox etdiyimiz səhv | Cihazın ömrünü uzatmağın sadə yolu

Notbuklar çox vaxt texniki nasazlıqlardan deyil, zərərsiz görünən bir vərdişdən sıradan çıxır.

Söhbət yumşaq səthlərdə ‒ divan, çarpayı, yastıq üzərində işləməkdən gedir. Cihaz parça və ya örtük üzərində dayandıqda havalandırma dəlikləri bağlanır və isti hava çölə çıxa bilmir. Nəticədə, korpusun içində temperatur yüksəlir, prosessor, videokart qızır, çip və radiator arasındakı termopasta quruyur.

Bundan əlavə, yumşaq səthlərdən toz və tük ventilyatorlar vasitəsilə cihazın içinə çəkilir, ana plata üzərində yığılır və soyuducunu tıxayır. Qat-qat kir istilik izolyatoru kimi fəaliyyət göstərir. Bu, performansın azalmasına və zamanla komponentlərin sıradan çıxmasına gətirib çıxarır.

Yüksək temperatur litium-ion batareyalarının sürətli tənəzzülünə səbəb olur. Müntəzəm qızma zamanı onların tutumu artıq bir il ərzində 20-30 faiz azalır.

Ekspertlərin sözlərinə görə, notbukun ömrünü uzatmaq üçün sərt dayaq və ya heç olmasa bir kitabdan istifadə etmək lazımdır. Bu, cihazın alt hissəsi ilə səth arasında boşluq yaradaraq havanın sərbəst dövran etməsinə imkan verəcək.