"X"də pul qazanmaq şərti dəyişib

“X”, yəni keçmiş “Twitter” pul qazanma tələbində önəmli dəyişiklik edib. Şirkətin etdiyi yenilik daha çox insanın pul qazanmasına şərait yaradacaq.

Belə ki, ötən il İlon Maskın satın aldığı “X”in rəsmi dəstək hesabı vasitəsilə yeni pul qazanma şərtləri ilə bağlı mühüm məlumat paylaşılıb. Məlumata görə, son 3 ayda 15 milyon baxış sayı 5 milyona, minimum ödəniş məbləği isə 50 dollardan 10 dollara endirilib.

Baxış sayının botlar vasitəsilə çox sürətlə artması ehtimalı olduğundan yalnız “X Premium” (“Twitter Blue”) abunəçilərinin izlənmələri nəzərə alınacaq. Beləliklə, botlardan istifadə edərək milyonlarla baxış yığmaq mümkün olmayacaq.

Qeyd edək ki, artıq bəzi istifadəçilər “X” sosial şəbəkəsindən pul qazandıqlarını açıqlayıblar. Təxminən 750 min izləyicisi olan yazıçı Brayan Krassenşteyn “Twitter”in ona 24 305 dollar ödədiyini iddia edib. Bundan əlavə, 230 min izləyicisi olan başqa bir istifadəçi 2236, 1,7 milyon izləyicisi olan siyasi şərhçi Benni Conson isə 9546 dollar qazandığını bildirib.