Şirkət süni intellekt sahəsi üçün 80 milyard dollar ayırmağı planlaşdırır

"Alphabet" şirkəti "Google"un süni intellekt infrastrukturunun gələcək inkişafını maliyyələşdirmək məqsədilə səhmlərin satışı hesabına 80 milyard dollar cəlb etməyi planlaşdırdığını açıqlayıb.

"CNBC" telekanalının məlumatına görə, bu vəsait korporativ və fərdi istifadəçilər tərəfindən süni intellekt sahəsində həll və xidmətlərə rekord səviyyədə artan tələbat fonunda hesablama güclərinin genişləndirilməsi üçün lazımdır.

"Google" süni intellekt sahəsinə ayırdığı xərcləri artırmaqda davam edir. Şirkət apreldə 2026-cı il üzrə kapital xərcləri ilə bağlı proqnozunu əvvəlki 175–185 milyard dollardan 180–190 milyard dollara yüksəldib.

Şirkətin rəhbəri Sundar Piçai həmin vaxt əsas problemlərdən birinin hesablama güclərinin çatışmazlığı olduğunu bildirib.

Analitiklərin hesablamalarına görə, "Alphabet", "Microsoft", "Meta" və "Amazon" şirkətləri bu il birlikdə kapital xərclərinə 700 milyard dollardan çox vəsait yönəldəcəklər. 2027-ci ilədək isə süni intellekt infrastrukturu sahəsinə qlobal investisiyaların həcmi 1 trilyon dolları ötə bilər.