Telegrama əsas təzyiqi kimlər göstərir? - FTB kirayə qaldığım evə gəlib…

“Telegram”ın Rusiya hakimiyyətinin nəzarətində olması barədə məlumat onun yaranma tarixini bilməyən insanlar tərəfindən yayılır.

Bunu “Telegram”ın baş direktoru Pavel Durov amerikalı jurnalist Taker Karlsona verdiyi müsahibəsində deyib.

“Bunu “Telegram”ın necə yarandığı barədə çox məhdud məlumatı olan insanlar deyə bilər və bizi gözdən salmaq istəyən rəqiblərimiz bu məlumatı yayanları həvəsləndirə bilər. Çünki “Telegram” meşə yanğını kimi yayılır”, – o bildirib.

Durov ABŞ xüsusi xidmət orqanlarının nəzarəti barədə də danışıb:

“ABŞ-nin harasında olmağımızdan asılı olmayaraq, FTB və təhlükəsizlik xidmətləri bizə həddən artıq diqqət yetirir. Nə vaxt ABŞ-yə getsəm, FTB agentləri məni hava limanında qarşılayır və suallar verirlər. Bir dəfə saat 9:00-da səhər yeməyi yeyirdim və FTB kirayə qaldığım evə gəldi. Onlar bilirdilər ki, mən Rusiyanı tərk etmişəm. Nə etdiyimizi bilirdilər, amma təfərrüatı istəyirdilər. Həm də San-Fransiskoda soyğunçuların hücumuna məruz qaldıqdan sonra ABŞ-də biznes qurmaqdan imtina etdim. Digər ölkələrdən Almaniya, İngiltərə və Sinqapurdan isə bürokratiyaya görə uzaqlaşdım. Ona görə də indi ofisimiz Dubaydadır”.

Durovun sözlərinə görə, “Telegram”a əsl təzyiq hökumətlərdən deyil, “Apple” və “Google”dən gəlir: “Bu iki platforma əslində smartfonunuzda oxuya biləcəyiniz hər şeyə senzura tətbiq edə bilər”.

Bu kontekstdə o, ayfon və androidlərin təhlükəsiz olmadığını vurğulayıb.