10 yaşlı oğlanı ailəsi diləndirib? | Bədənində yara izləri var

“Bakı Metropoliteni” Qapalı Səhmdar Cəmiyyətinin polis əməkdaşları tərəfindən təxminən doqquz-on yaşlarında bir uşaq baxımsız vəziyyətdə aşkarlanaraq Uşaq Sığınacağı Reinteqrasiya Mərkəzinə yerləşdirilib.

Bu barədə Azərbaycan Uşaqlar Birliyinin sədri Kəmalə Ağazadə məlumat verib.

O qeyd edib ki, ilkin qiymətləndirmələr zamanı uşağın bədənində xəsarətlərin olduğu müəyyən olunub:

“Uşağın dediklərinə əsasən, valideyni tərəfindən davamlı olaraq işgəncələrə məruz qalması və diləndirilməsi ilə bağlı aidiyyəti qurumlara məlumat vermişik. Uşaq təhsildən yayındırılıb. Hazırda ilkin ibtidai təhsili ilə bağlı sığınacaqda onunla iş aparılacaq”.

Daxili İşlər Nazirliyinin mətbuat xidmətindən isə məsələ ilə bağlı araşdırma aparıldığı bildirilib.