“2 nəfər üçün 300-500 manat...” | Yay tətili hansı ölkələrdə daha sərfəlidir? - Baku TV

İnsanların böyük qismi istirahət üçün yay fəslini seçir. Bu mövsüm turizm sahəsinin də canlanma dövrüdür. Bəziləri istirahətini dəniz kənarında, bəziləri isə dağların qoynunda keçirməyi düşünür. Təbii ki, başqa ölkələrin mədəniyyətini, tarixini öyrənmək istəyənlər də az deyil.

Vətəndaşlar mövzu ilə bağlı fikirlərini Baku TV ilə bölüşüblər.

“Bölgələrimizlə müqayisədə xaricdə istirahət etmək daha ucuz başa gəlir. Bizim bölgələrdə qiymətlər yerli əhali üçün olduqca bahadır”, – onlardan biri söyləyib.

Digər bir sakin isə Türkiyəyə səyahəti daha sərfəli hesab etdiyini deyib:

“Düşünürəm ki, Türkiyədə istirahət etmək bizim bölgələrlə müqayisədə həm sərfəli, həm də yeni atmosfer və tanışlıqlar baxımından daha maraqlıdır”.

Mövzu ilə bağlı fikirlərini bölüşən turizm eksperti Babək Rüstəmov qiymətlər barədə bunları deyib:

“Şimal bölgələrimizdən Quba rayonunda qonaqlama və yemək xərcləri də daxil olmaqla 2 nəfərin 2 günlük istirahəti təxminən 300–500 manat aralığında dəyişir. Xarici ölkələrə gəldikdə isə səyahəti 3–4 ay öncədən planlaşdırdıqda 1 nəfərin xərci 800–1000 manat civarında olur”.