Adi bir salamlaşma hansı xəstəliklərə yol açır?

"Adi əl sıxaraq salamlaşma, əsas gigiyena qaydalarına riayət edilmədikdə, müxtəlif infeksiyaların ötürülmə yollarından birinə çevrilə bilər".

Bu barədə rusiyalı həkim-bakterioloq Vera Bondarçuk yerli mediaya müsahibəsində xəbərdarlıq edib.

Mütəxəssisin sözlərinə görə, gün ərzində insanın əlləri bakteriya, virus, göbələk və digər patogen mikroorqanizmlərin ola biləcəyi səthlərlə dəfələrlə təmasda olur. Ən geniş yayılmış çirklənmə mənbələri arasında nəqliyyatdakı tutacaqlar, lift düymələri, telefonlar, pul və bank terminalları yer alır.

Ekspert izah edib ki, çirklənmiş səthlə təmas özlüyündə hələ yoluxma demək deyil. Əsas risk o zaman yaranır ki, insan əl sıxdıqdan sonra əlləri ilə üzünə, gözlərinə, burnuna, dodaqlarına toxunur və ya yemək yeyir. Belə olan halda, dəridə infeksiyaların törədiciləri qala bilər ki, bunlar da təmas vasitəsilə asanlıqla başqa şəxsə ötürülür.

Həkim həmçinin əlavə edib ki, toxunma vasitəsilə dəri xəstəlikləri və göbələk infeksiyaları da keçə bilər. Lakin hər əl sıxmanı mütləq təhlükə kimi qəbul etmək lazım deyil. Profilaktikanın ən effektiv yolu küçədən, nəqliyyatdan, heyvanlarla təmasdan sonra, həmçinin yemək hazırlamazdan və yeməkdən əvvəl əlləri müntəzəm olaraq sabunla yumaqdır.