Ağdamda rahat və təhlükəsiz həyat | Eyvazxanbəyli kəndində nələr tikiləcək? - Baku TV

“Birinci mərhələ üzrə Eyvazxanbəyli kəndində ümumilikdə 427 fərdi yaşayış evinin inşası nəzərdə tutulur. Planlaşdırılan evlər müxtəlif tip və ölçülərdə olmaqla bir, iki, üç, dörd və beşotaqlı olaraq tikiləcək”.

Bu sözləri Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin mətbuat katibi Təranə Quliyeva deyib.

O, kənddə yaradılacaq infrastruktur barədə də məlumat verib:

“Kənddaxili yolların inşası layihəsi üzrə ümumi uzunluq 13,9 kilometr təşkil edir. Bundan əlavə, kənddə 120 yerlik uşaq bağçası, Ailə Sağlamlıq Mərkəzi və inzibati bina tikiləcək. Ümumilikdə Eyvazxanbəyli kəndi üzrə həyata keçirilən layihələr gələcəkdə müasir infrastruktura malik, rahat və təhlükəsiz yaşayış məntəqəsinin formalaşdırılmasına xidmət edir”.

Yenidənqurma işlərində çalışan Ağdam sakini Faiq Qurbanov da təəssüratlarını bölüşərək doğma yurdunda aparılan tikintidə iştirakından qürur duyduğunu vurğulayıb:

“Fəxr edirəm ki, bu gün torpaqlarımız azaddır və mən də buradakı tikinti işlərində iştirak edirəm. Allah şəhidlərimizə rəhmət etsin, qazilərimizə cansağlığı versin. Bir Ağdam sakini kimi ən böyük arzum hər zaman bu bərpa işlərinə töhfə vermək olub. Çox şadam ki, bu gün bu arzumu reallaşdırıram”.