Aktaudakı faciəvi qəzaya həsr olunmuş poçt markası təqdim edildi - Baku TV

“Azərbaycan Hava Yolları” (AZAL) və “Azərpoçt” Bakı-Qroznı marşrutu üzrə planlaşdırılmış “J2-8243” reysinin icrası zamanı baş vermiş faciəyə həsr olunan poçt markasını təqdim edib.

Markanın dizaynında yer alan sonsuzluq simvolu faciəli hadisənin, onun qurbanlarının və milli tariximizdə iz qoymuş ekipajın qəhrəmanlığının yaddaşlarda daim yaşadılmasını ifadə edir. Diqqətçəkən məqamlardan biri də xatirə poçt markalarının satışından əldə edilən bütün vəsaitin “YAŞAT” Fonduna ianə olunacağıdır.

Layihə faciə qurbanlarının əziz xatirəsinə ehtiram ifadə etməklə yanaşı, ekstremal şəraitdə peşəkar, koordinasiyalı və fədakar fəaliyyəti nəticəsində 29 nəfərin həyatını xilas etmiş ekipaj üzvlərinin qəhrəmanlığını ön plana çıxarır.

Tədbir çərçivəsində xatirə poçt markalarının Milli qəhrəmanların ailə üzvlərinə və “J2-8243” reysinin ekipaj üzvlərinə təqdim olunması onların cəsarət və peşəkarlığına göstərilən ictimai ehtiramın ifadəsi olub.

Tədbirin sonunda qonaqlar üçün Milli Azərbaycan Tarixi Muzeyi üzrə ekskursiya təşkil olunub. Muzeydə həmçinin sözügedən reysin heyətinə həsr edilən ayrıca bölmə də mövcuddur.

Qeyd edək ki, 2024-cü il dekabrın 25-də “J2-8243” nömrəli Bakı-Qroznı reysini yerinə yetirən AZAL-a məxsus “Embraer 190” tipli sərnişin təyyarəsi Qazaxıstanın Aktau şəhəri istiqamətinə qəza enişi həyata keçirib. Göyərtədə olan 67 nəfərdən 38-i həyatını itirib, 29 nəfər isə sağ qalıb.