Altsheymeri əvvəlcədən öyrənmək mümkün olacaq? | Ən sadə və ucuz üsul

Seçenov Universitetinin Sinir Xəstəlikləri Klinikasında beyin onurğa mayesində (BOM) Altsheymer xəstəliyinin biomarkerlərinin tədqiqinin yüksək effektivliyi nümayiş etdirilib.

Pasiyentlərin 85,3 faizində BOM-də Altsheymer xəstəliyinə xas olan biomarkerlər aşkarlanıb. Bu, orta səviyyəli idrak pozğunluqları və yüngül demensiya mərhələsində dəqiq diaqnoz qoymağa imkan verib.

Hazırda Altsheymer xəstəliyinin diaqnostikası üçün pasiyentin idrak funksiyaları, davranışı və emosional vəziyyəti qiymətləndirilir, həmçinin başın maqnit-rezonans görüntüləməsi aparılır. Lakin alimlər alternativ olaraq BOM-də Altsheymer xəstəliyinin markerlərinin analizini təklif edirlər.

“BOM-də biomarkerlərin analizi Altsheymer xəstəliyinin təsdiqlənməsi üçün ən sadə və nisbətən ucuz üsuldur. Bu analizə əsasən qoyulan Altsheymer diaqnozunun dəqiqliyi patoloji-anatomik diaqnoza yaxınlaşır. Bu metod digər neyrodegenerativ beyin xəstəlikləri ilə differensial diaqnostika aparmağa, Altsheymer xəstəliyini erkən mərhələdə müəyyən etməyə, demensiya meydana çıxmadan xeyli əvvəl beyindəki patoloji prosesi aşkar etməyə imkan verir”, ‒ deyə professor Vladimir Parfenov bildirib.