Ana 14 aylıq körpəsindən imtina edib? | Günlərdir tək qalan uşağın aqibəti

Tovuzda uzun müddət evdə tək qalan körpə aşkarlanıb.

Hadisə Göygöl rayon sakini 39 yaşlı Aygün Qədimovanın kirayə qaldığı mənzildə qeydə alınıb.

Ana körpənin uzun müddət tək qalması iddialarını təkzib edib:

“Martın 17-si saat 11:00 radələrində uşağı yedizdirib, içizdirib evdən çıxmışdım. Axşam saatlarında zəng gəldi ki, uşaq xəstəxanadadır”.

Tibbi Ərazi Bölmələrini İdarəetmə Birliyindən verilən məlumata görə, hazırda körpənin müalicələri davam etdirilir:

“Martın 17-si 2024-cü il təvəllüdlü azyaşlı polislər tərəfindən Tovuz Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya edilib.

Daxil olarkən körpəyə susuzlaşma, susuzluğun təsirindən yaranan əzginlik, süstlük, raxitlik diaqnozu qoyulub.

Azyaşlıya lazımi tibbi xidmətlər göstərildikdən sonra Tovuz Rayon Mərkəzi Xəstəxananın Pediatriya şöbəsinə köçürülüb, vəziyyəti stabildir”.

Ailə, Qadın və Uşaq Problemləri üzrə Dövlət Komitəsindən bildirilib ki, sözügedən körpə ilə bağlı Ailə, Qadın və Uşaq Problemləri üzrə Dövlət Komitəsi, Tovuz Rayon İcra Hakimiyyəti və Daxili İşlər Nazirliyinin rayon polis şöbəsi ilə birlikdə dərhal araşdırma aparılıb, körpənin həyat və sağlamlığı, təhlükəsizliyi üçün tədbirlərə başlanılıb:

“Ailə, Qadın və Uşaq Problemləri üzrə Dövlət Komitəsi tərəfindən Göygöl Uşaq və Ailələrə Dəstək Mərkəzinə verilən sorğu əsasında körpənin ailəsi ilə bağlı məlumatlar əldə edilib. Məlum olub ki, Aygün Qədimova nikahdankənar doğulan, evdə günlərdir tək saxlanılan 1 yaş 2 aylıq olan övladına sahib çıxmaq istəmir.

Hazırda Tovuz Rayon Xəstəxanasında olan azyaşlı körpənin sağlamlığı ilə bağlı hər hansı bir təhlükə yoxdur. O, Bakıya gətirilərək dövlət uşaq müəssisəsinə yerləşdiriləcək”.