AQTA-dan rəsmi açıqlama | "Nestle"nin uşaq qidalarında uyğunsuzluq aşkarlanmayıb - Baku TV

“Nestle” şirkətinin körpə və erkən yaşlı uşaqlar üçün nəzərdə tutulan bəzi məhsullarının ehtiyat tədbiri olaraq geri çağırılması uşaq qidalarının təhlükəsizliyi məsələsini yenidən gündəmə gətirib.

Finlandiya, Almaniya, Birləşmiş Krallıq kimi bir sıra Avropa ölkələrində bu şirkətə məxsus müxtəlif ticarət nişanları adı altında istehsal olunan məhsulların müəyyən partiyaları dövriyyədən çıxarılıb. Geri çağırmaya səbəb istehsal prosesi zamanı məhsulların “Bacillus cereus” bakteriyasının ifraz etdiyi “Cereulide” toksini ilə çirklənmə riskidir.

Bu hadisə Azərbaycan bazarında satılan uşaq qidalarının təhlükəsizliyi və nəzarət mexanizmləri ilə bağlı sualları yenidən aktuallaşdırıb.

Qida mütəxəssisi Məhsəti Hüseynova bildirib ki, “Bacillus cereus” bakteriyasının ifraz etdiyi “Cereulide” toksini zəhərlənməyə, mərkəzi sinir sisteminin və həzm sisteminin pozulmasına səbəb ola bilər.

O əlavə edib ki, əgər immun sistemi zəifdirsə, bu, uşaqlarda ciddi fəsadlara yol aça bilər:

“Üzərində bəzən son istifadə tarixi uzun göstərilsə də, açıldıqdan sonra qısa müddətdə istifadə edilməlidir. Əgər qida hazırlandıqda yapışqanlıq varsa, kənar qoxu hiss olunursa və uşaqda qidanı qəbul etdikdən sonra qarın şişkinliyi, ağrı, narahatlıq yaranırsa, bu qidanı istifadə etməmək tövsiyə olunur”.

Məsələ ilə bağlı Qida Təhlükəsizliyi Agentliyindən bildirilib ki, “Nestle” şirkətinə məxsus ölkəmizdə satışda olan uşaq qidalarında hər hansı uyğunsuzluq aşkarlanmayıb:

“İstehsal prosesi zamanı bakteriya mənşəli çirklənmə ehtimalı ilə bağlı “Nestle” şirkətinin geri çağırdığı bəzi uşaq qidaları ölkəmizə idxal edilməyib. Bununla belə, ehtiyat tədbiri olaraq “Nestle” şirkətinin istehsal etdiyi və ölkəmizdə satışda olan bəzi məhsullarından Azərbaycan Qida Təhlükəsizliyi Agentliyi tərəfindən nümunələr götürülərək müayinələrə cəlb edilib. Sınaq nəticəsində hər hansı uyğunsuzluq aşkarlanmayıb”.