Arıçıların ən böyük düşməni | Belə şey görməmişdim, 1 dəqiqədə yüzlərləsini məhv edə bilər!

Lənkəranda arıçılıq təsərrüfatlarında peyda olan vəhşi arıların bir-ikisi kifayət edir ki, bir arı ailəsini məhv etsin.

El arasında “eşşək arısı” kimi tanınan bu arılar insan həyatı üçün də təhlükəlidir.

Mütəxəssislər bildirirlər ki, vaxtında görülən tədbirlər müəyyən qədər problemin qarşısını ala bilir.

Bu arılar əsasən payızın əvvəlində peyda olur. Onlar yayda işdən yorulan bal arılarının zəiflədiyini hiss edir və ancaq zəif arı ailələrini gəzib axtarır. Güclü arı ailəsinin üstünə gedə bilmirlər.

Arıçı Ramiz Cəfərov bildirib ki, bəzi mənbələrdən verilən məlumata görə, sözügedən arı bir dəqiqədə neçə yüz arı öldürür:

“Mən belə bir şey görməmişdim. Bir neçə il bundan qabaq kənd sakinini yeddi-səkkizi sancmışdı, üç gün komada qaldı, güclə ayıldı”.

Arıçılıq üzrə mütəxəssis Elçin Xalıqov deyir ki, həmin arıların qarşısını alıb az miqdarda ziyanla çıxmaq arıçılardan asılıdır: “Məsləhətim budur ki, onların yuvasını dağıtsınlar. Həmçinin dərmanlama aparmaq lazımdır”.

Mütəxəssis onu da bildirib ki, vəhşi arılar heç vaxt güclü arı ailələrinin üstünə gedə bilmir. Arıçının da birinci iş prinsipi odur ki, zəif ailəni güclü ailə ilə birləşdirsin. Arı ailəsi zəif olduqda həmin arılar ailəyə daxil olub, yem ehtiyatını dağıdır, arının özünü də öldürür. Onlardan bir neçəsi isə arıxanada olduğu zaman ailəni tamam məhv edə bilir.