Avtomobillərin utilizasiyasında yenilik

Avtomobili utilizasiya edilmiş şəxsə yeni avtomobil üçün güzəşt tətbiq etməyən satıcı cərimələnəcək.

Bu, Prezident İlham Əliyevin təsdiqlədiyi İnzibati Xətalar Məcəlləsinə dəyişikliklərdə öz əksini tapıb.

Qanuna əsasən, nəqliyyat vasitəsini utilizasiyaya verən və bu barədə təsdiqedici sənəd əsasında yeni istehsal olunmuş nəqliyyat vasitəsi almaq istəyən şəxslərə güzəşt etməyən satıcı 4000 manat məbləğində cərimə ediləcək.

Utilizator tərəfindən qanunda nəzərdə tutulan qaydada və müddətdə təsdiqedici sənədin verilməməsinə görə vəzifəli şəxslər 3000, hüquqi şəxslər isə 5000 manat məbləğində cərimə ediləcəklər.

Həmçinin utilizasiya edilmiş nəqliyyat vasitələrindən əldə edilən materialların və əşyaların ehtiyat hissələrinin emalı və satışı ilə məşğul olan sahibkarlıq subyektlərinə satılması barədə utilizator tərəfindən qanunda nəzərdə tutulan qaydada və müddətdə yazılı məlumatın verilməməsinə görə vəzifəli şəxslər 300, hüquqi şəxslər 600 manat məbləğində cərimə olunacaqlar.

Qanun eyni zamanda utilizator tərəfindən “Tullantılar haqqında” qanunda nəzərdə tutulan qaydada verilən təsdiqedici sənədlərlə bağlı yazılı məlumatın nəqliyyat vasitələrinin utilizasiyası üzrə operatora vaxtında verilməməsinə görə vəzifəli şəxslərin 700 manat, hüquqi şəxslərin isə 1500 manat məbləğində cərimə olunmasını nəzərdə tutur.

Bu qanun 2024-cü ilin sentyabrın 1-də qüvvəyə minəcək.

Utilizasiyaya verilən avtomobilə görə güzəşt məbləği və birdəfəlik ödənişin həcmi də müəyyənləşdiriləcək. Nazirlər Kabineti 3 ay müddətinə utilizasiya haqqının məbləğini, güzəşt məbləğini və birdəfəlik ödənişin həcmini təsdiqləyəcək.